Nikodema Rancāna konkursa nūslāgums šūgod Kruoslovā
Nikodema Rancāna konkursam ir dasaceiti 8 pretendenti nu Rēzeknis piļsātys i nūvoda, Daugovpiļs vaļstspiļsātys, Reigys, Kruoslovys i Ludzys nūvoda. Nūslāguma pasuokums nūtiks 28. septembrī 14:00 stuņdēs Kruoslovys Kulturys nomā.
- Rancāna bolvai ir dasaceiti 8 pretendenti nu pīcu Latgolys pošvaļdeibu i Reigys. Pretendenti, leidzeigi kai īprīškejā godā puorstuov divys pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā i par radūšu i psihologiski atbolstūšu pīeju muoceibu ci studeju vidē. Var nūvāruot, ka leluokajā daļā pīteikumu ir atkluotys školuotuoja aktivitatis nūvoda vuiceibā ci latgalīšu volūdā i kulturizgleiteibā.
Nūslāguma pasuokums nūtiks 28. septembrī 14:00 stuņdēs Kruoslovys Kulturys nomā. Iz pasuokumu gaideiti kai pretendentu izvierzietuoji, tai jūs atbaļsteituoji, poši konkursa daleibnīki, kai ari īprīškejūs godu nominanti i sadarbeibys partneri. Īpazeisim Kruoslovys pusis muzykalūs ļauds: Kruoslovys muzykys i muokslys školys vokalū ansambli “Kruoslaveņa” (vadeituoja Olga Grecka), “Ondrupinis kapelu” Daiņa Platača vadeibā. Byus vareiba nūsavērt iz leluo ekrana Viļānu Muzykys i muokslys školys bārnu i pedagogu veiduotū animacejis kinu “Vydsmuižys Annužys acim” (2023). Var tikai atguodynuot, ka kinys iniciatore ir bejuse Latgolys Etnografiskuos viestnīceibys vadeituoja Iveta Seimanova, kas ari ir nomināta N. Rancāna bolvai. Naizpaliks ari sirsneigys sarunys i otkon redziešonuos prīca pi čaja.
Konkursu organizej Latgalīšu kulturys bīdreiba sadarbeibā ar Kruoslovys nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.
Konkursa nūslāgums ir daļa nu projekta” Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis”, kū finansiali atbolsta Sabīdreibys integracejis fonds nu Kulturys ministrejis dūtajim Latvejis vaļsts budžeta leidzeklim. Informativais atbolsts – “Vietējā Latgales avīze”, Latgalīšu kulturys ziņu portals lakuga.lv, Rēzeknis Tehnologeju akademeja.
Ilga Šuplinska,
Latgalīšu kulturys bīdreibys vadeituoja